Праведный Максим, иерей Тотемский, некоторое время был священником в городе Тотьме Вологодской епархии. В течение сорока лет он проходил тяжелый подвиг юродства о Христе, постоянно находясь в посте и молитве. Скончался блаженный Максим в глубокой старости 16 января 1650 года и был погребен в Воскресенской церкви, в которой служил. Местное почитание святого началось в 1715 году, в связи с многочисленными чудесами, происходившими при его гробе.

Тропарь праведнаго Максима, глас 4
Непорочным священством Богови послужив, посреде мирскаго мятежа юродство избрал еси, взем бо крест, последовал еси Христу невозвратным помыслом и, с любовию к Нему добродетельми приближался, земная оставив, Небесная восприял еси, блаженне Максиме, отче наш, моли Христа Бога сохранитися граду Тотьме невредиму и спастися душам нашим.

Кондак праведнаго Максима, глас 4
Божественному гласу последуя, возревновал еси наставляти паству свою не мудростию слова, но буйством жития безмятежнаго, непрестанными молитвами и слезными струями душу и тело омывая, воздушными стихиями плоть изнуряя, темже и по смерти чудесы тя Господь прослави, да с верою зовем к тебе: радуйся, Богомудре отче наш Максиме.

Величание
Величаем тя, святый праведный Максиме, и чтим святую память твою, ты бо молиши за нас Христа Бога нашего.

Молитва праведному Максиму Тотемскому
О преблаженне и досточудне угодниче Божий, Максиме праведный! Восприяв благодать Святаго Духа, первее послужил еси непорочным священством Пресвятей Троице, предстоя Престолу Божию и принося о людех Безкровныя Жертвы. Егда же, ко Господу крайним желанием одержим, юродивое житие Христа ради избрал еси, мирския прелести отринул еси, наготою телесною, якоже багряницею, одеяся, солнечный зной и великий мраз с любовию претерпе, подвизался во граде Тотьме, и сего ради наследовал еси Небесный Чертог в селениях праведных. Но яко имеяй дерзновение ко Христу Богу, пролей о нас, о святче Божий, теплыя молитвы, да избавимся мы всякия нужды и всякаго сопротивнаго зла. Не престай молити Слова, Христа Бога нашего, о граде и людех, сохранитися им неврежденным от глада и язвы, огня и меча и от нашествия супостатов. Низпосли с Небесе, о священная главо, преблаженне Максиме, на нас, усердно притекающих к тебе и с любовию лобызающих святый образ твой, мир, благодать и спасение душам нашим, да и мы со всеми святыми наследницы будем Небеснаго Царствия, воспевающе купно Святую Троицу, Отца, и Сына, и Святаго Духа, ныне, и присно, и во веки веков. Аминь.




Back

 

PayPal